काठमाडौं । २०७४ सालयता १९ वर्षीया संगीता विश्वकर्मा र गोविन्द कार्कीबीच टेलिफोनमा संवाद हुन्थ्यो। टेलिफोन संवादकै क्रममा उनीहरूबीच प्रेम सम्बन्ध भयो । गोविन्दले संगीताको थर सोध्दा ‘मगर’ भनेकी थिइन् । यहीबीचमा २०७४ असोज २९ गते उनीहरूले बिहे गरे । भागेर बिहे गरेका उनीहरूलाई बाबु-आमाले भित्र्याए ।

उनीहरू केही समय घरमै रहँदा संगीता विश्वकर्मा भएको थाहा भयो। प्रहरीका अनुसार यो कुरा थाहा पाएपछि परिवारले गोविन्दलाई फकाइफुल्याइ गर्न थाले । उनी पनि परिवारको कुरामा राजी भएपछि बाबु र दुई छोरा भएर संगीतालाई मार्ने योजना बनाए ।

२०७४ साल कात्तिक १४ गते संगीताको शव सिम्लेको एक जंगलमा फेला पर्‍यो । बिहे गरेको १५ दिनमै उनको शव फेला परेको थियो ।झुण्ड्याएर हत्या गरी मान्छे नचिनियोस् भनेर उनीहरूले संगीताको अनुहारमा एसिड पनि छ्यापिदिएका थिए । शव फेला पर्नाबित्तिकै माइती पक्षले तीनै जनाविरूद्ध किटानी जाहेरी प्रहरीमा दिए ।

संगीता उदयपुरगढी-५ बाहुनीटारकी हुन् ।
उनलाई परिवारले ‘उपल्लो जात’को केटासँग बिहे नगर भनेका पनि रहेछन्। तर, संगीताले ‘प्रेम सम्बन्ध हो, केही फरक पर्दैन’ भन्ने गरेकी थिइन् । किटानी जाहेरीपछि प्रहरीले लामो समय अनुसन्धान गर्‍यो । तर, प्रतिवादी पक्राउ परेका थिएनन् ।

उदयपुरका प्रहरी नायब उपरीक्षक प्रेमसागर केसीका अनुसार उनीहरू सबै भागेका थि।
भाग्नेबित्तिकै शंका उनीहरूतिरै बढी केन्द्रित भय । केही समय श्रीमान्,ससुरा र देवर दार्जिलिङ गएका थिए । गत मंसिर २२ गते मनबहादुरदेवर घरमा रहेको थाहा पाएपछि प्रहरी टोली गएको थियो । उनलाई घरबाटै पक्राउ गरेपछि नैनबहादुरससुरा र गोविन्द काठमाडौंमा रहेको पत्ता लाग्यो ।

दुवैलाई प्रहरीले काठमाडौंको कपनबाट २३ मंसिरमा नियन्त्रणमा लियो । तीनै जनालाई कर्तव्य ज्यान मुद्दामा अनुसन्धान थालेपछि उनीहरूले घटना कबुल गरे । प्रहरीले अनुसन्धान प्रतिवेदन सरकारी वकिलको कार्यालयमा पेश गर्‍यो । आइतबार तीनै जनाविरूद्ध मुद्दा दर्ता भएपछि अदालतले पुर्पक्षका लागि थुनामा पठायो ।

उदयपुर कटारी नगरपालिका-४ सिम्लेका मनबहादुर कार्की, नैनबहादुर कार्की र गोविन्द कार्कीलाई अदालतले सोमबार कारागार चलानको आदेश दिएको हो । अदालतले तत्काल प्राप्त प्रमाणले उनीहरूलाई निर्दोष मान्न सकिने आधार नदेखिएकाले पुर्पक्षका लागि कारागार चलाउन आदेश गरेको स्रेस्तेदार राजकुमार आचार्यले बताए ।

इलाका प्रहरी कार्यालय कटारीले संगीता विश्वकर्माको हत्यामा संलग्न भएको अनुसन्धान प्रतिवेदन सरकारी वकिल कार्यालयमा पेश गरेको थियो । आइतबार तीनै जनाविरूद्ध वकिल कार्यालयले मुद्दा दर्ता गरेको थियो ।