काठमाडौं । मिथिला नगरपालिका-५ श्रीपुरका २४ वर्षीय दिलीपकुमार महतोलाई टिपरले किच्नुअघि नै हत्या गरिएको आशंका प्रहरीले सार्वजनिक गरेको छ । प्रारम्भिक अनुसन्धानमा महतोलाई टिपरले किच्नुअघि छातीमा गहिरो चोट लगाएको देखिएको छ ।

धनुषा प्रहरीले शनिबार साँझ पत्रकार सम्मेलन गरी महतोलाई ना७ख ६४१३ नम्बरको टिपरले किच्नुअघि कोखामा घोचेको घाउ फेला परेको जनाएको हो । प्रहरी उपरीक्षक रमेशकुमार बस्नेतका अनुसार महतोको दाहिने छातीको कोखा छेडिएको छ । ‘टिपरको लिभरले छेडेपछि उनलाई सुताएर किचेको प्रारम्भिक अनुसन्धानमा खुलेको छ,’ ।

यसकारण महतोको त्यसैबेला मृत्यु भइसकेको थियो भन्ने आशंका बलियो बन्दै गएको बस्नेतले बताए। ‘पोस्टमार्टम रिपोर्ट आइसकेपछि यसबारे पूर्णरूपमा बताउन सकिन्छ,’ उनले भने । पत्रकार सम्मलेन गर्दै प्रहरीले हत्यामा संलग्न आरोपमा पक्राउ परेका धनुषाका मिथिला नगरपालिका-५ का २७ वर्षीय क्रसर सञ्चालक विपीनकुमार महतो, वडा नम्बर-९ का ३४ वर्षीय टिपर चालक मुनिन्द्र महतो, महोत्तरी बर्दिवास नगरपालिका वडा नम्बर-२ का लोडर चालक जितेन्द्रकुमार महतो र मिथिला वडा नम्बर ५ का रोशन यादवलाई सार्वजनिक गरेको छ ।

बस्नेतका अनुसार पक्राउ परेकाले महतोलाई खोलामा सुताएर टिपरले किच्नुअघि घाइते बनाएको स्वीकार गरेका छन् । ‘उनीहरूले सुरूमा कोखामा घोचेको स्वीकार गरिसकेका छन्,’ उनले भने । औरही खोलाको बगरमा टिपरले बालुवा गिट्टी चोरी गरी लागिरहेका बेला महतोले पटक-पटक रोक्न खोजेका थिए । सोही विषयमा शुक्रबार महतोको हत्या गरिएको थियो । पक्राउ परेकालाई कर्तव्य ज्यानमुद्दामा अनुसन्धान थालिएको छ ।