नागरिक सम्मान, स्वास्थ्य शिविर तथा भित्ते पात्रो विमोचन कार्यक्रम सम्पन्न
काठमाडौं । सामुदायिक सेवा केन्द्र तथा सामुदायिक प्रहरी सेवा केन्द्र, ईचंगुनारायणद्वारा आयोजित रुद्री, होम,नागरिक सम्मान, स्वास्थ्य शिविर तथा भित्ते पात्रो विमोचन कार्यक्रम सम्पन्न भएको छ।
सामुदायिक सेवा केन्द्र तथा सामुदायिक प्रहरी सेवा केन्द्र, ईचंगुनारायणद्वारा आयोजित रुद्री, होम,नागरिक सम्मान, स्वास्थ्य शिविर तथा भित्ते पात्रो विमोचन कार्यक्रम काठमाडौं उपत्यका प्रहरी कार्यालयका कार्यालय प्रमुख प्रहरी अतिरिक्त महानिरीक्षक टेक बहादुर तामाङको प्रमुख आतिथ्यतामा सम्पन्न भएको हाे ।
सामुदायिक प्रहरी साझेदारी कार्यक्रम अन्तर्गत रुद्री, होम, नागरीक सम्मान, स्वास्थ्य शिविर तथा भित्ते पात्रो विमोचन कार्यक्रमलाई सम्बोधन गर्नु हुदै प्रहरी अतिरिक्त महानिरीक्षक टेक बहादुर तामाङले स्थानिय स्तरबाटै अपराध रोकथाम र नियन्त्रण गर्न नेपाल प्रहरीको एकल प्रयासबाट मात्र सम्भव नहुने हुँदा स्थानिय जनसमुदायको समेत भूमिका महत्वपूर्ण रहेकाले नागरिकहरुको सूचना र सहकार्यले मात्र समाजमा शान्ति, सुरक्षा र अमनचयन कायम गर्न सकिने बताउनुभयो ।
साथै कुनै निस्चित घर,परिवार तथा समुदाय मात्र नभई समग्र राष्ट्रलाई नै असर गर्ने गम्भीर चुनौतिको रूपमा रहेको लागूऔषध दुर्व्यवसनको वर्तमान अवस्थालाई मध्यनजर गर्दै काठमाडौं उपत्यका प्रहरी कार्यालयद्वारा लागूऔषध विरूद्धको महाअभियान कार्यक्रम सञ्चालन गरेकोमा यस अभियानलाई सफल बनाउन सामुदायिक सेवा केन्द्रको साथ, सहयोग, सहकार्य र समन्वय आवश्यकता रहेको बताउनु हुदै लागूऔषध सेवनकर्ताहरुलाई समुदाय स्तरमै अनुशिक्षणका साथै सामाजिक पुन:स्थापना गर्ने गरी समुदाय स्तरबाटै लागूऔषध दुर्व्यवसनको निराकरण गरी नेपाल प्रहरीको “सुरक्षित उपत्यका : हाम्रो प्रतिवद्धता” अभियानलाई सहयोग गर्नु हुन समेत उपस्थित सबैमा अनुरोध गर्नु भयो ।
नागार्जुन नगरपालिका वडा नं. १,२ र ३ का स्थानिय जेष्ठ नागरिकलाई सम्मान गरिएको उक्त कार्यक्रममा सामुदायिक सेवा केन्द्र तथा सामुदायिक प्रहरी सेवा केन्द्र इचगुंनारायणका अध्यक्ष प्रताप दानी, जिल्ला प्रहरी परिसरका काठमाडौंका कार्यालय प्रमुख प्रहरी वरिष्ठ उपरीक्षक विश्व अधिकारी,बाचन पण्डित दिन बन्धु पोख्रेल, सिनियर प्रहरी अधिकृतहरु, सामुदायिक प्रहरी सेवा केन्द्रका संरक्षक तथा पदाधिकारीहरु, नागरिक समाज तथा स्थानिय भद्र भलादमीहरु लगायत अन्य प्रहरी कर्मचारीहरुको उपस्थिति रहेको थियो ।
२८ चैत २०८१, बिहीवार २२:११ बजे प्रकाशित
