काठमाडौँ । नेपाल प्रहरीले अनधिकृत पहुँच र फिसिङ एसएमएसमार्फत ठगीका घटना बढ्दै गएकाले सर्वसाधारणलाई सतर्क रहन आग्रह गरेको छ। प्रहरीको साइबर ब्युरोले एक सूचना जारी गर्दै ‘AT_Alert’, ‘THE_Alert’ लगायत बल्क एसएमएस सेवा प्रदायकहरूको नाम दुरुपयोग गरी प्रयोगकर्ताका संवेदनशील वित्तीय विवरण चोरी गर्ने प्रयास भइरहेको जनाएको छ।

ब्युरोका अनुसार ‘Your account will be locked in 6 hours. Verify immediately’ वा ‘Your connectIPS linked accounts have been suspended due to security reasons. Please complete the self-verify process to regain access.’ जस्ता भ्रामक सन्देशहरू व्यापक रूपमा पठाइएको पाइएको छ।

यस्ता एसएमएसमा समावेश लिङ्कमा क्लिक गर्दा प्रयोगकर्ता नक्कली वेबसाइटमा पुग्छन्, जहाँ उनीहरूलाई आफ्नो युजरनेम, पासवर्ड, वा अन्य संवेदनशील जानकारी दिन बाध्य पारिन्छ। यी विवरणहरूको दुरुपयोग गरी ठगहरूले डिजिटल वालेट तथा बैंक खाताबाट रकम निकाल्ने गरेका छन्।

साइबर ब्युरोले यस्ता भ्रामक वा शंकास्पद सन्देशहरूमा प्रतिक्रिया नजनाउन र त्यसमा समावेश लिङ्कमा क्लिक नगर्न सबैलाई आग्रह गरेको छ। यस्ता सन्देश प्राप्त भएमा सम्बन्धित डिजिटल सेवा प्रदायक, बैंक वा नजिकको प्रहरी कार्यालयमा सम्पर्क गर्न सुझाव दिइएको छ।

ब्युरोका प्रहरी उपरीक्षक अवस्थीले साइबर अपराधबाट जोगिन व्यक्तिगत सतर्कता नै प्रमुख उपाय भएको उल्लेख गर्दै प्रविधिको बढ्दो प्रयोगसँगै ठगीका स्वरूपहरू जटिल बन्दै गएको बताए। उनले वित्तीय कारोबार तथा व्यक्तिगत जानकारीको सुरक्षामा नागरिक स्वयंले विशेष ध्यान दिनुपर्नेमा जोड दिए।

प्रहरीका अनुसार यस्ता अवैध कार्यमा संलग्न ठगहरूले बल्क एसएमएस सेवा दुरुपयोग गरी सयौँ–हजारौँ व्यक्तिलाई एकैपटक निशाना बनाइरहेका छन्, जसले वित्तीय सुरक्षामा गम्भीर चुनौती थपेको छ। प्रहरीले यस्ता घटनामा संलग्न जोसुकैलाई पनि कानुनअनुसार कारबाही गरिने स्पष्ट पारेको छ।