बेझाड । पाल्पा रामपुर नगरपालिका–७ स्थित विजय प्राथमिक विद्यालयका बालबालिकालाई न्यानो कपडा वितरण गरिएको छ । गरिमा विकास बैंक लिमिटेड शाखा कार्यालय रामपुरले सामाजिक उत्तरदायित्व बहन गर्दै ५८ जना बालबालिकालाई शनिबार कपडा वितरण गरेको हो ।

पुसको कठ्याङ्ग्रिदो जाडोमा न्यानो कपडा स्वीटर पाएपछि बालबालिका खुशी भएका छन् ।
शाखा कार्यालय रामपुरका प्रमुख रमेश घिमिरेले बालबालिकाको शैक्षिक स्तरमाथि उठाउन सबैले सहयोग गर्नुपर्छ भने । रामपुर नगरपालिकाका प्रमुख रमणबहादुर थापाले कपडा वितरण गर्दै बालबालिकाको शिक्षा र स्वास्थ्यमा नगरपालिकाले विशेष ध्यान दिएको जानकारी दिए ।

गरिमा विकास बैंकले विद्यालयमा आएर साना साना बालबालिकालाई  सहयोग गरेकोमा विद्यालय व्यवस्थापन समितिका अध्यक्ष दोवराज तिवारीले खुशी व्यक्त गरे । विद्यालय स्थापनाको ५०औँ वर्ष पुगेपनि शैक्षिक क्षेत्रमा सुधार आउन सकेको छैन । हाल यहाँ नर्सरी देखि ४ सम्म पठनपाठन हुदै आइरहेको छ ।