काठमाडौं । फोटो जर्नालिस्ट क्लब नेपालले फोटो प्रतियोगिताको सातौं संस्करण ‘नेपाल फोटो प्रतियोगिता२०७६ְ को घोषणा गरेको छ। क्लबले आइतबार कमलादीस्थित होटल रोयल सिंघीमा एक कार्यक्रमको आयोजना गरी ‘नेपाल फोटो प्रतियोगिता २०७६’ को घोषणा गरेको हो। ग्लोबल आइएमई बैंक नेपाल तथा आइएमई ग्रुपका अध्यक्ष चन्द्रप्रसाद ढकालले नेपाल फोटो प्रतियोगिता २०७६ सुरू भएको घोषणा गरेका थिए। उनले आफूले खिचेको फोटोलाई फोटो प्रतियोगितामा समावेशका लागि ‘अनलाइन इन्ट्री’ गरी प्रतियोगिताको सुरूवात गरे।

विभिन्न सात विधामा प्रतिस्पर्धा गराइने प्रतियोगितामा भाग लिन चाहने प्रतियोगीले आइतबारबाटै फोटो दर्ता गराउन थालेका छन्। आइतबारबाट सुरू भएको दर्ता प्रक्रिया माघ १७ सम्म रहने जनाइएको छ। प्रतियोगितामा व्यावसायिक र सौखिन सबैखाले फोटोग्राफर तथा फोटो पत्रकार सहभागी हुन पाउने क्लबले जनाएको छ। प्रतियोगितामा विदेशी नागरिक तथा विदेशमा खिचिएको फोटोले भने सहभागिता जनाउन पाउने छैनन्।

तर, खेलकुद विधाको हकमा नेपालबाहिर खिचिएको तस्बिर भने समावेश गराउन पाइने छ। उक्त फोटोमा नेपाली वा नेपाल झल्कने विषय भने कतै न कतै देखिएको हुनुपर्ने मापदण्ड क्लबले बनाएको छ। कार्यक्रममा सबै अतिथिलाई फोटो पत्रकार क्लब नेपालकी महासचिव श्रुती श्रेष्ठले स्वागत गरेकी थिइन्। फोटो प्रतियोगिताको घोषणासँगै गत वर्षको फोटो प्रतियोगितामा समावेश फोटोहरूको संग्रह पुस्तक ‘नेपाल ल्याण्ड अफ कन्ट्रास्ट’ पनि लोकार्पण गरिएको थियो।

कार्यक्रममा ग्लोबल आइएमई बैंक तथा आइएमई ग्रुपका अध्यक्ष चन्द्रप्रसाद ढकाल, नेपाल ललितकला प्रज्ञा प्रतिष्ठानका उपकुलपति गोपाल चित्रकार, नेपाल पर्यटन बोर्डका निमित्त निर्देशक विमल कँडेल, शिखर इन्स्योरेन्स प्रालिका वरिष्ठ प्रवन्धक सुरज राजवाहक, अर्घाखाँची सिमेन्ट प्रालिका कामु महाप्रबन्धक रमेश थापा, मनराम ग्रुपका संरक्षक श्रीमती मनमाया श्रेष्ठ र फोटो जर्नलिस्ट क्लब नेपालका अध्यक्ष विकास कार्की थिए।

कार्यक्रममा नेपाल ललितकला प्रज्ञा प्रतिष्ठानका उपकुलपति गोपाल चित्रकारले स्थापनाको छोटो समयमा नै क्लबले ठोस उपलब्धी हासिल गरेको बताए। ‘यो फोटो जर्नालिस्ट क्लबको अवधारणा एउटा सानो कोठामा भएको थियो,’ उनले भने, ‘तर, यसले स्थापनाको यति छोटो समयमै पाएको उपलब्धि निकै गौरबशाली छ।

कार्यक्रमका अर्का वक्ता पर्यटन बोर्डका निमित्त निर्देशक विमल कँडेलले क्लबको फोटो प्रतियोगिताजस्तो कार्यक्रममा पर्यटन बोर्ड जोडिन पाउँदा खुसी लागेको बताए। उनले यस्ता फोटो प्रतियोगिताले बोर्डलाई सहयोग पुग्नेसमेत उल्लेख गरे।