नयाँ दिल्ली– भारतले कोरोना संक्रमणको जोखिमलाई मध्यनजर गर्दै आगामी मे महिनाको ३ तारिख सम्म वैशाख २१ गते सम्मका लागि लकडाउन बढाएको छ ।
भारतीय प्रधानमन्त्री नरेन्द्र मोदीले मंगलबार देशबासीका नाममा सम्बोधन गर्दै कोरोनाविरुद्धको लडाइँमा जीत हासिल गर्न लकडाउनको अवधि बढाइएको बताए ।

सबै राज्य सरकार र जनताको सुझावअनुसार ३ मे सम्मका लागि लकडाउन बढाउने निर्णय गरिएको प्रधानमन्त्री मोदीले बताए ।

‘लकडाउनबाट देशलाई धेरै फाइदा मिलेको छ । मात्र आर्थिक कोषबाट हेर्दा यो धेरै महङ्गो बनेको छ,’ मोदीले भने, ‘भारतबासीको जिन्दगीको अगाडि यसको कुनै तुलना हुन सक्दैन ।’

भारतले देशमा करिब ५०० को हाराहारीमा कोरोना संक्रमित भेटिएपछि २५ मार्चदेखि लागू हुनेगरी २१ दिनका लागि लकडाउन घोषणा गरेको थियो ।
हाल भारतमा कोरोना भाइरस संक्रमितको संख्या १० हजार ४५३ पुगेको छ । यस्तै करिब ३ सय ५८ को हाराहारीमा कोरोना संक्रमितको मृत्यु भएको छ भने १ हजार १९३ जना उपचारपछि निको भएका छन् ।

प्रधानमन्त्री मोदीले कोरोनाविरुद्धको लडाइँमा भारतले सही मार्ग अंगालेका कारण अझै पनि यसको फैलावट तीव्र हुन नसकेको बताए । ‘सीमित संशाधनको उपलब्धतताका बीच भारत जुन मार्गमा अगाडि बढेको छ, त्यसको चर्चा विश्वभर भइरहेको छ । जुन स्वभाविक हो,’ मोदीले भने ।