७६ (२) अनुसार सरकार गठन प्रक्रिया अघि बढाउन राष्ट्रपतिलाई कानुनविद्हरूको सुझाव

3.55K
shares

काठमाडौं । कानुनविद्हरूले राष्ट्रपति रामचन्द्र पौडेललाई संविधानको धारा ७६ (२) अनुुसार नयाँ सरकार गठन प्रक्रिया अघि बढाउन सुझाव दिएका छन् ।

राष्ट्रपति पौडेलले बोलाएका कानुनविदमध्ये सबैजसोले ७६ (२) को प्रक्रियामा जोड दिए भने वरिष्ठ अधिवक्ता चन्द्रकान्त ज्ञवालीले ७६ (३) अनुसार प्रक्रिया अघि बढाउन उचित हुने सुझाव दिए । ज्ञवालीको सुझाव अनुसार सरकार बनाउँदा ठूलो दलको आधारमा सरकार बनाउने प्रक्रियामा जानुपर्ने हुन्छ ।

छलफलमा सहभागी नेपाल बार एसोसिएसनका अध्यक्ष गोपालकृष्ण घिमिरेका अनुसार संविधानतः र राजनीतिक रूपमा पनि उपधारा २ अनुसारको प्रक्रियामा कानुनविदहरूको जोड थियो । ‘एकातिर संवैधानिक व्यवस्था र नजीरहरूले समेत सुरुवाती प्रक्रियाबाट नै सरकार गठन गर्नुपर्छ भन्ने मान्यता स्थापित गरेको छ,’ कानुनविद्हरूको सुझावलाई उदृृत गर्दै उनले भने, ‘कुनै दलले बहुमत जुटाउँछु भनी दाबीसहित प्रयास गर्दागर्दैै अर्को प्रक्रियामा जानु हुँदैन भन्ने हामी सुझावको सार थियो ।’

कानुनका प्राध्यापक डा. विपिन अधिकारीले संवैधानिक प्रावधान उल्लेख नगरी सरकार गठनका लागि आह्वान पनि गर्न सकिने सुझाव दिएको एक सहभागीले बताए ।

राष्ट्रपति पौडेलले परामर्शका लागि कानुनविद्हरू पूर्णमान शाक्य, विपिन अधिकारी, गोपालकृष्ण घिमिरे, हरिहर दाहाल, शेरबहादुर केसी, टिकाराम भट्टराई, चन्द्रकान्त ज्ञवाली र सीताराम केसीलाई शीतल निवास बोलाएका थिए ।