भैरहवा, १२ फागुन ।

रुपन्देहीको सिद्धार्थनगर नगरपालिकाले हालसम्म पनि करको दायरामा नआएका व्यवसायिक प्रतिष्ठानलाई करको दायरामा ल्याउन घरदैलो अभियान सञ्चालन गर्ने भएको छ । प्रत्येक वडाका टोलटोलमा रहेका व्यवसायिक प्रतिष्ठान (पसलहरु) मा पुगेर राजस्वका बारेमा बुझाएर सबैलाई करको दायरामा ल्याउन अभियान सञ्चालन गर्न लागिएको नगर उपप्रमुख उमा अधिकारीले बताउनुभयो । सोमबार भैरहवास्थित नगर कार्यपालिकाको कार्यालयमा बसेको राजस्व परामर्श समिति, सिद्धार्थनगरको बैठकले राजस्व (कर) सम्बन्धि अभियान सञ्चालन गर्ने निर्णय गरेको उपप्रमुख अधिकारीले बताउनुभयो । ‘कर दर नभइ दायरा बढाउने हो, उहाँले भन्नुभयो –‘यसका लागि घरदैलो अभियान सञ्चालन गर्ने निर्णय गरेका छौं ।’ राजस्व परामर्श समितिको संयोजक समेत रहनुभएकी अधिकारीले कर भन्नबित्तिकै धेरै हो कि भन्ने पनि बुझाइ पनि रहेको पाइएको बताउनुभयो । त्यसैले पनि करको बारेमा बुझाएर सबैलाई करको दायरामा ल्याउनु अभियानको उद्देश्य रहेको उहाँले जानकारी दिनुभयो । निर्वाचनपछि यो अभियान सञ्चालन गरिने नगरपालिकाको प्रशासकीय अधिकृत कमलकान्त खनालले जानकारी दिनुभयो । त्यस्तै बैठकले सिद्धार्थनगर नगरपालिका वडा नम्बर ५ मा अवस्थित कृषि बजार भवन अन्तर्गत (ए ब्लक) सुचारु गर्न सूचना सम्प्रेषण गर्ने निर्णय गरेको छ । ‘भवन सञ्चालन हुन नसकेकोबारे बारम्बार कुरा उठिरहन्छ । यसको सञ्चालनका लागि विगतमा समिति गठन गरेको थियौं । समितिले एउटा रिपोर्ट पेश गरिसकेको हुनाले ए ब्लक सुचारुको लागि सूचना सम्प्रेषण गर्ने निर्णय गरिएको छ, ’उहाँले भन्नुभयो ।