मङ्सिर २९ र ३० गते ‘तेस्रो तामाङ मौलिक सेलो संगीत महोत्सव’ काठमाडौ हुँदै
काठमाडौं । नेपाल तामाङ कलाकार संघले यहि मंसिर २९ र ३० गते राजधानीको चुच्चेपाटीमा तामाङ मौलिक सेलो संगीत महोत्सव गर्ने भएको छ ।
तामाङ मौलिक गीत,संगीत,सभ्यता,संस्कृतिको प्रवद्र्धन गर्ने उद्धेश्यले तेस्रो संस्करणको रुपमा यो महोत्सव गर्न लागिएको बुधबार आयोजित पत्रकार सम्मेलनमा जानकारी दिइएको हो ।
‘तामाङ मौलिक संस्कृतिको मेरुदण्डको रुपमा रहेको डम्फू संस्कृति अर्थात ताम्बा संस्कृति हाम्रो प्राण हो,हाम्रो शान हो ।’,पत्रकारमाझ महोत्सवको अवधारणापत्र सार्वजनिक गर्दै तामाङ कलाकार संघका अध्यक्ष विशाल काल्ताने भन्नुभयो,–‘डम्फू संस्कृतिले हाम्रो ठुङसा(उत्पति), सभ्यता,बाप्साको कुरा गर्छ,यसैको जगबाट सिर्जिएको सेलो संगीत,डम्फू तथा ताम्बा संस्कृतिको प्रवद्र्धनका लागि महोत्सव गर्ने भएका हौं ।’
कार्यक्रमको मुल आकर्षणको रुपमा नै ताम्बा संस्कृति रहने उहाँको स्पष्टोक्ती छ । महोत्सवमा ताम्बाहरुद्धारा डम्फूको महत्वलाई प्रष्ट्याउने,विज्ञहरुसँग अन्र्तक्रिया र ताम्बा संस्कृतिका गीतहरुको प्रस्तुती झनै पृथक रहने उल्लेख गरिएको छ । यसका लागि दोस्रो दिन ३० गतेको कार्यक्रमहरु सांगीतमय बनाउने आयोजकको तयारी छ ।
‘ह्याङला ह्रिमठिम ह्याङला ग्योअी,ह्याङनोन डिक्सी छार्ना लाअी’ भन्ने नाराका साथ हुन लागेको महोत्सवले यिनै मौलिक सेलो संगीत,डम्फू,ताम्बा संस्कृति संगीत,डम्फू,ताम्बा संस्कृति प्रस्तुती,प्रदर्शन एवं यो विषय छलफल बहसमा ल्याउने उहाँको भनाई छ ।
महोत्सवमा तामाङ भाषा,संस्कृति,गीत संगीतमा महत्वपूर्ण योगदान दिने प्रतिभाहरुलाई सम्मान गर्ने कार्यक्रम समेत रहेको उहाँले बताउनुभयो ।
तामाङ सांस्कृतिक सभ्यता सम्बन्धि सबै कुराहरु समेटेर महोत्सव गर्ने क्रममा तामाङ कला,संस्कृति,भेषभूषा,खानाका परिकारहरुको स्टलहरु पनि हुनेछन् ।
महोत्सव २९ गते बौद्धस्थित तामाङ संघसंस्थाहरुसँगको सहकार्य सहभागिता सहित तामाङ कलाकारहरुको सांस्कृतिक र्याली चुच्चेपाटी हायत मैदानमा पुगे पश्चात औपचारीक समारोहका बीच बागमती प्रदेश सरकारका आर्थिक मामिला तथा योजना मन्त्री बहादुर सिं तामाङको पमुख आतिथ्यतामा उद्घाटन गर्ने तय भएको संघका महासचिव खेम मोक्तानले जानकारी दिनुभयो ।
यो महोत्सवलाई तामाङहरुको आफ्नै मौलिकतासँग जोडिएको पृथक खालको कार्यक्रमको रुपमा चित्रित गर्दै संघका अध्यक्ष काल्तानले आआफ्नो तर्फबाट सक्दो सहयोग गर्न एवं प्रत्यक्ष रुपमा अवलोकनका लागि तामाङ समुदायमा अनुरोध गर्नुभयो ।
पत्रकार सम्मेलनमा महोत्सवबारे तयार पारिएको प्रचार सामाग्री पोष्टरको अध्यक्ष काल्तानका साथै लोक सम्राट चन्द्रकुमार मोक्तान,वरिष्ठ गायक तथा संगीतकार चन्द्रकुमार दोङ,रोज मोक्तान,प्रेम लोप्चन,गायिका इन्दिरा गोले,इन्दिरा योञ्जन,संघका सल्लाहकार द्धय विश्व दोङ र सञ्जिव वाईबा,वरिष्ठ नायिका चाँदनी मोक्तान लगायतका अतिथिहरुले संयुक्त रुपमा सार्वजनिक गर्नुभएको थियो । सोही अवसरमा महोत्सवको जिंगल पनि सार्वजनिक गरिएको थियो ।
२० मंसिर २०८०, बुधवार २१:५६ बजे प्रकाशित
