काठमाडौ । नेपालको सुदूरपश्चिममा अवस्थित विकट पहाडी जिल्ला अछाम, जहाँ शिक्षाको पहुँच अझै चुनौतीपूर्ण छ। यहींको रामारोशन गाउँपालिका–४ मा जन्मिएको एक सामान्य परिवार आज सम्पूर्ण देशका लागि प्रेरणाको स्रोत बनेको छ। यो हो—न्यौपाने परिवारको कथा, जसले कठिनाइका बीच पनि साहस, शिक्षा र सेवाभावको अनुकरणीय उदाहरण प्रस्तुत गरेको छ।

परिवारका पितृपुरुष देवानन्द न्यौपानेले शिक्षण पेशामा ४४ वर्ष बिताएर हालै मात्र अवकाश लिनुभयो। उहाँकी श्रीमती पारु न्यौपाने गृहिणी हुनुहुन्छ। शिक्षाको उज्यालो फैलाउन समर्पित यो जोडीले आफ्ना सन्तानमा नैतिकता, परिश्रम र राष्ट्रसेवाको भावना रोपिदिए—र तिनै मूल्यमान्यताले आज उनको परिवारलाई राष्ट्रको गौरवपूर्ण स्थानमा पुर्‍याएको छ।

एउटै कोखबाट जन्मिएका सिद्धराज, केशर र मुकेश न्यौपाने आज नेपाल प्रहरीका अधिकृतका रूपमा आ–आफ्ना कमाण्ड सम्हाल्दै सेवा गरिरहेका छन्। यस्तो उदाहरण नेपालमा दुर्लभ छ।

जेठा छोरा सिद्धराज न्यौपाने हाल पूर्वप्रधानमन्त्री पुष्पकमल दाहाल ‘प्रचण्ड’का पीएसओ (व्यक्तिगत सुरक्षा अधिकृत) हुन्। २०६३ सालमा प्रहरी निरीक्षकको रूपमा संगठनमा प्रवेश गरेका उनी २०७४ मा प्रहरी नायब उपरीक्षक (डीएसपी)मा बढुवा भए। लामो समयदेखि सुरक्षाको जिम्मेवारीमा खटिएका सिद्धराज एक कुशल र अनुभवी अधिकृतको रूपमा चिनिन्छन्।

माइलो छोरा केशर न्यौपाने अहिले सल्यान जिल्लाको प्रहरी प्रमुखको रूपमा कार्यरत छन्। २०७० मा प्रहरी निरीक्षक बनेका उनी २०८० मा डीएसपीमा पदोन्नति भए। काठमाडौँ, हेटौंडाजस्ता शहरी क्षेत्रमा काम गरिसकेका उनी हाल सल्यानमा सुरक्षाको जिम्मा सम्हालिरहेका छन्।

सबैभन्दा कान्छा छोरा मुकेश न्यौपाने २०७६ मा प्रहरी निरीक्षक भए। हाल उनी रुपन्देहीको बेलैया इलाका प्रहरी कार्यालयमा कार्यरत छन्। नवप्रवेशी भए पनि उनी नेतृत्वमा दृढता, निष्ठा र दक्षताको परिचायक बनेका छन्।

न्यौपाने परिवारको यो उपलब्धिको आर्थिक सम्पन्नता वा पहुँच होइन—यो हो, इमान्दार श्रम, सुसंस्कार र शिक्षामैत्री सोच। अछामदेखि कैलालीको जानकी गाउँपालिका, बन्देवीपुरसम्मको यात्रा केवल भौगोलिक होइन, प्रेरणाको एक गहिरो यात्रा हो।

एउटै आमाबाट जन्मिएका तीन दाजुभाइ नेपाल प्रहरीमा सिनियर अफिसर हुनु, केवल गौरवको कुरा होइन—यो सामाजिक ऊर्जा, आत्मबल र दूरदर्शिताको सजीव उदाहरण हो।

न्यौपाने परिवारको कथा नेपाली समाजलाई सन्देश दिन्छ—सपना देख्न सीमान्तता बाधा बन्दैन। समर्पण, शिक्षा र सेवाभावले सामान्य परिवार पनि असामान्य उचाइमा पुग्न सक्छ। यही हो साँचो राष्ट्रसेवाको प्रेरणा !!