किसानलाई कृषि सामग्री वितरण

कृषकलाई दुईवटा तालीमसहित औजार र दाना वितरण

Nepal Life Insurance Long Ad

टोखा नगरपालिकाले किसानलाई कृषि सामग्री वितरण गरेको छ ।

काठमाडौँको उत्तरी क्षेत्रमा रहेको टोखाले प्रधानमन्त्री कृषि आधुनिकीकरण परियोजनाको पकेट कार्यक्रमबाट आएको रु २५ लाख र टोखाको कृषि शाखाबाट विनियोजन गरिएको रु २५ लाख गरी रु ५० लाख बराबरको कृषि सामग्री वितरण गरेको हो ।

नगरपालिका प्रमुख प्रकाश अधिकारीले उक्त कार्यक्रमअनुसार कृषकलाई दुईवटा तालीमसहित औजार र दाना वितरण गरिएको जानकारी दिनुभयो ।

टोखाले आधुनिक प्रविधि अपनाएर गाईको दूध दुहुने मेशिन, गाईलाई बस्नका लागि ओछ्याउने म्याट, गोठ सफा गर्ने भ्याकुम स्टाइलको मेशिन, चेष्ट फ्रिजर, हिलटेक ट्याङ्की र दाना वितरण गरेको छ ।

यसैगरी वडा नं १ देखि ११ भित्रका पशुपालन गर्ने ४२ कृषक परिवारलाई उनीहरुको आवश्यकतानुसारको मेशिन र अन्य ४२ परिवारलाई दाना र गोठ सफा गर्ने मेशिन दिइएको छ ।

टोखाले पशुपालन गर्ने कृषकलाई हौसला बढाउँदै व्यावसायिक बनाउन र उनीहरुलाई आधुनिकीकरणमा लैजान प्रधानमन्त्री कृषि आधुनिकीकरण परियोजनाको सहयोगमा कृषि औजार सामग्री वितरण गरिएको जनाएको छ ।

यस्तै नगरपालिकाले मानव सेवा आश्रम सामाखुशीलाई औषधि र स्वास्थ्य उपकरण सहयोग गरेको छ । टोखाले बिहीबार आश्रममा रहेका बालबालिका तथा वृद्धवृद्धाको स्वास्थ्यलाई ध्यानमा राखेर उक्त सामग्री सहयोग गरेको हो ।

नगर प्रमुख अधिकारीले टोखाको आठौँ नगरसभाबाट भएको निर्णयअनुसार रु पाँच लाख बराबरको औषधि र स्वास्थ्य सामग्री वितरण गरिएको जानकारी दिनुभयो ।

टोखाले अक्सिजन कन्सनटेटर, इसिजी मेशिन, स्टेचर, ह्विलचेयरलगायत विभिन्न ३८ प्रकारका औषधि र १७ प्रकारका औजार/उपकरण वितरण गरेको हो ।

मानव सेवा आश्रमले देशभरका सडकमा रहेका अनाथ बालबालिका तथा वृद्धवृद्धाको व्यवस्थापन गर्दै आएको छ ।

मकवानपुरको हेटौँडामा मुख्य कार्यालय रहेको आश्रमले देशभरका विभिन्न जिल्लामा कार्यालय सञ्चालन गरी सडकमा मानवमुक्त अभियान सञ्चालन गरेको छ ।

१७ वैशाख २०७८, शुक्रवार १४:१५ बजे प्रकाशित

प्रतिक्रिया दिनुहोस्

सम्बन्धित शीर्षकहरु