भैरहवा। रुपन्देही जिल्ला सिद्धार्थनगर नगरपालिकाका उपप्रमुख उमा अधिकारीले तिब्बतबाट आएको भोटेकोशी नदीको भीषण बाढीबाट प्रभावित नागरिकहरूको सहयोगार्थ आफ्नो एक महिनाको पारिश्रमिक (तलब) राहत कोषमा जम्मा गरी सहयोग गर्नुभएको छ। नगरपालिकामा आयोजित विपद व्यवस्थापन सम्बन्धी एक विशेष कार्यक्रममा बोल्दै उहाँले यो केवल मौखिक घोषणा मात्र नभई संकटमा परेका नागरिकका लागि तत्कालको व्यावहारिक सहयोग भएको स्पष्ट पार्दै उक्त रकम सहयोग गर्ने निर्णय गर्नुभएको हो।

चीनको स्वशासित क्षेत्र तिब्बतमा गएको हिमपहिरो र गेग्रान बहावका कारण भोटेकोशी नदीमा आएको आकस्मिक भीषण बाढीले तल्लो तटीय क्षेत्र तथा भोटे टोल लगायतका बस्तीहरूमा पुर्‍याएको ठूलो क्षतिप्रति गहिरो दुःख व्यक्त गर्दै उपप्रमुख अधिकारीले यो मानवीय कदम चाल्नुभएको हो।विपद सम्बन्धी कार्यक्रममा सहयोग र ऐक्यबद्धता नगरपालिकाद्वारा आयोजित उक्त विपद सम्बन्धी कार्यक्रममा सिद्धार्थनगर नगरपालिकाका प्रमुख (मेयर) इस्तियाक अहमद खान, उपप्रमुख उमा अधिकारी, प्रमुख प्रशासकीय अधिकृत, तथा विभिन्न वडाका वडा अध्यक्षहरूको उपस्थिति रहेको थियो।

कार्यक्रममा बोल्दै उपप्रमुख अधिकारीले भन्नुभयो, “विपत्तिको यो घडीमा ठूला-ठूला गफ र घोषणा मात्र गरेर पुग्दैन, पीडित नागरिकको उद्धार र राहतका लागि हामी आफैँले आफ्नो तर्फबाट सिधा सहयोग गर्नुपर्छ।” उहाँको यो तत्परता र तत्कालको प्रतिबद्धतालाई कार्यक्रममा सहभागी सबैले सराहना गरेका थिए।बैठकमा नगर प्रमुख इस्तियाक अहमद खानले अन्तर्राष्ट्रिय सीमा क्षेत्र (तिब्बत) बाट सुरु भई नेपालतर्फ जनधनको ठूलो क्षति पुर्‍याएको यस प्राकृतिक विपत्तिको सामना गर्न सम्पूर्ण जनप्रतिनिधि र प्रशासनिक संयन्त्र एकजूट भएर लाग्नुपर्ने जोड दिनुभयो।

बैठकले प्रभावित क्षेत्रका पीडित परिवारहरूलाई तत्कालै खाद्यान्न, सफा खानेपानी, त्रिपाल र औषधोपचारको प्रबन्ध मिलाउने निर्णय समेत गरेको छ।यसैगरी, उपप्रमुख अधिकारीको यो सराहनीय कदमको प्रशंसा गर्दै बैठकमा सहभागी वडा अध्यक्षहरू तथा प्रशासनिक अधिकारीहरूले पनि व्यक्तिगत एवं संस्थागत रूपमा राहत कार्यमा पूर्ण सहयोग गर्ने प्रतिबद्धता जनाएका छन्। नगरपालिकाले विपद जोखिम न्यूनीकरण र राहत वितरण सम्बन्धी संकलन गरिएका थप आधिकारिक विवरणहरू सिद्धार्थनगर नगरपालिकाको वेबसाइट मा नियमित अपडेट गरिने जानकारी दिएको छ।

विपत्तिमा सधैँ अगाडि: जाजरकोट भूकम्पमा पनि थियो उत्तिकै सहयोगप्राकृतिक विपत्तिको घडीमा उपप्रमुख अधिकारीले देखाएको यो उदारता पहिलो भने होइन। यसअघि जाजरकोटलाई केन्द्रबिन्दु बनाएर गएको विनाशकारी भूकम्पका बेला पनि उहाँले भूकम्प प्रभावित नागरिकहरूको उद्धार, उपचार र पुनर्स्थापनाका लागि आफ्नो एक महिनाको पूरा तलब राहत कोषमा जम्मा गरेर सहयोग गर्नुभएको थियो। संकटको समयमा देशको जुनसुकै कुनामा रहेका नेपाली नागरिकहरूलाई मलम पट्टी लगाउन अग्रसर हुने उहाँको यो पुरानो कदम र अहिलेको निरन्तरताले उहाँको उच्च मानवीय भावना र जिम्मेवारीपनलाई उजागर गरेको कार्यक्रममा चर्चा गरिएको थियो।