काठमाडौं । दश खेलाडीमा रहेर खेलको अन्त्य गरेको संकटा क्लबले सोमबार सहिद स्मारक ‘ए’ डिभिजन लिगमा जावलाखेल युथ क्लबमाथि २-० को विजय हासिल गरेको छ ।

जावलाखेलका एडोमा डोउमबियालाई कुहिनाले हानेका म्याक्सवेल एलोनलाई रेफ्री कबिन ब्यन्जनकारले १८औं मिनेटमा दोस्रो पहेँलो कार्ड ९ रातो कार्ड०पाएका थिए । त्यसको एक मिनेटअघि मात्र एलोनलाई रेफ्रीले पहिलो पटक पँहेलो कार्ड देखाएका थिए। लिगमा जारी सिजन यो पहिलो रातो कार्ड हो ।

‘सजिलै तीन अंक आउँछ जस्तो लागेको थियो तर रेफ्रीको निर्णयले गाह्रो भयो । यस्तो तालले लिग सञ्चालन गरेर काम छैन । कस्तो ट्याकलमा कस्तो कार्ड दिने भन्ने नै छैन । एउटै खेलाडीलाई एक मिनेटको अन्तरमा कार्ड दिएको छ,’ रेफ्रीको निर्णयमा असन्तुष्ट बनेका संकटाका प्रशिक्षक सल्यान खड्गीले भने, ‘हामी शीर्ष पाँचमा रहने हाम्रो लक्ष्य हो । तर रेफ्रीले यस्तै निर्णय गर्दै गयो भने के भन्न सकिन्छ र ।’

१८ मिनेटपछि दश खेलाडीमा सीमित बने पनि संकटाले खेल नियन्त्रणमा राखेको थियो । सेड्रिक अबाले ५७ औं मिनेटमा संकटालाई अग्रता दिए । सुबास गुरूङले दायाँ भागबाट दिएको पासलाई पेनाल्टी क्षेत्रमा कसैको निगरानीमा नरहेका सेड्रिक अबाले पोष्ट्को दिशा दिएका थिए । अवाले नै खेल सकिन ५ मिनेट बाँकी छँदा अर्को गोल थप्दै संकटाको जित पक्का गरे ।

जितसँगै ६ अंक जोडेको संकटा तेस्रो स्थानमा उक्लिएको छ । समान ६ अंक भए पनि गोलअन्तरका आधारमा थ्री स्टार शीर्ष स्थानमा छ भने मनाङ मर्स्याङ्दी दोस्रो स्थानमा छ । संकटाले पहिलो खेलमा सरस्वती युवा क्लबलाई १-० ले हराएको थियो । जावलाखेल नेपाल पुलिस क्लबसँग १-० ले पराजित भएको थियो ।

५२औं मिनेटमा गौतम श्रेष्ठको फ्री किकमा एडोमा डोउमबियाको हेड संकटाका राजाबाबु थापाले बचाइदिएपछि जावलाखेलले अग्रता लिने मौका गुमाएको थियो । एक खेलाडी बढी हुँदा पनि जावलाखेलले त्यसको फाइदा लिन सकेन ।

जावलाखेल प्रशिक्षक राजकुमार केसीले संगठित भएर खेल्न नसक्दा पराजिय हुनु परेको बताए । उनले थपे, ‘यो बीचमा एक महिना लिग भएन । यसबीचमा अभ्यास भएन । खेलाडी शारीरिक रूपमा पनि फिट भएनन् । उनीहरू दस खेलाडीमा सीमित भए पनि संगठित प्रदर्शन कायम गर्दा नतिजा निकाल्न सफल भए ।’