काठमाडौं । इण्डियन प्रिमियर लिग आइपीएल अन्तर्गत बिहिबार राती भएको खेलमा सनराइजर्स हैदरावाद किङ्स इलेभेन पञ्जावसँग पराजित भएको छ । जारी लिगमा हैदरावादको यो पहिलो हार हो । चण्डीगढमा १ सय ९४ रनको लक्ष्य पछ्याएको हैदरावाद ४ विकेटको क्षतिमा १ सय ७८ रनमा समेटिँदै १४ रनले पराजित भयो ।

सुरुवाती दुई ब्याट्म्यानलाई सस्तैमा गुमाएको हैदरावादका मध्यक्रमका ब्याट्सम्यानले केहि आशा लाग्दो प्रदर्शन गरेपनि जितका लागि पर्याप्त भने भएन । उसका लागि केन विलियम्सनले ५४, मनिष पाण्डेले ५७ तथा सकिब अल हसनले २४ रन बनाए । यसअघि टस जितेर पहिले व्याटिङ गरेको पञ्जावले क्रिस गेलको शतकीय पारीको मद्दतमा १ सय ९३ रन बनाएको थियो ।

विष्फोटक व्याटिङ गरेका गेलले ६३ बलमा अविजित १ सय ४ रन बनाउँदा ११ छक्का प्रहार गरे । हारका बाबजुद हैदरावाद रनरेटका आधारमा दोस्रो स्थानमा छ । पन्जाव तेस्रो स्थानमा छ । दुबैको समान ६ अंक छ ।