काठमाडौं । नेपाल कम्युनिष्ट पार्टी नेकपाका सांसद योगेश भट्टराईले डा.केसीले आफ्नै स्तर स्खलित गरेको टिप्पणी गरेका छन् ।आफूसँग भएका सहमति विपरीत शिक्षा तथा स्वास्थ्य समितिअन्तर्गतको उपसमितिले चिकित्सा शिक्षा विधेयकसम्बन्धी प्रतिवेदन बहुमतले पास गरेपछि डा.केसी आक्रोसित भएका छन् ।

केसीले भट्टराईसहित नेकपाका केही सांसदको नाम लिएर जनतामारा भएको र माफियालाई पोसेको आरोप लगाएकोमा भट्टराईले असन्तुष्टि जनाएका छन् । सोमबार बसेको बैठकमा आफुहरूमाथि जुन शब्दहरु केसीले प्रयोग गरेका छन् त्यो शब्दले केसीलाईनै जिन्दगीभर लखेट्ने, पछिसम्म गिज्याउँने र यो शब्दको भारीले केसीकै टाउको थिचिरहने भट्टराईले बताएका छन् ।

आफ्ना शब्दहरुलाई सही ढंगले प्रयोग गर्दा डा। केसीको पनि इज्जत हुने भट्टराईले बताएका छन् । डा.केसीको व्यक्तिगत इमान्दारितामा प्रश्न गर्न नचाहेको भन्दै उनले सानातिना कुरामा हात हालेर आफ्नो प्रतिष्ठा नगुमाउन सुझावसमेत दिए । भट्टराईले चिकित्सा शिक्षा विधेयक संसदको सम्पत्ति भएको भन्दै उनले त्यसमा थपघट गर्ने उसको अधिकार भएको बताए ।