काठमाडौं । टिकापुर घटनाका मुख्य अभियुक्त मानिएका रेशमलाल चौधरी बचाउँ अभियान सुरु गरिएको छ । थारु कल्याणकारिणी सभाले रेशम चौधरी बचाउँ अभियान थालेको हो । यो अभियान सप्तरीबाट सुरु हुदैंछ ।

उक्त अभियानको लागि भन्दै ३१ सदस्यीय संघर्ष समिति समेत गठन गरिएको छ । टीकापुर हत्याकाण्डको मुख्य योजनाकार मानिएका तथा कैलाली क्षेत्र नम्बर १ बाट निर्वाचित सांसद चौधरीले गत पुस १९ गते पद तथा गोपनियातको सपथ ग्रहण गरेका थिए ।

चौधरी हाल डिल्लीबजार कारागारमा छन् । उनीविरुद्ध जिल्ला अदालत कैलालीमा मुद्दा परेको थियो । फरार रहेकै अवस्थामा चुनाव लडेका उनी कैलाली १ बाट निर्वाचित भएका थिए ।

चुनाव जितेपछि उनले प्रमाणपत्र लिन पाउनुपर्ने माग गर्दै सर्वोच्चमा निवेदन दिएका थिए । तर, सर्वोच्चले रिट खारेज गरेपछि उनले अदालतमा आत्मसमर्पण गरेका थिए ।

२०७२ भदौ ७ गते कैलालीको टीकापुरमा थारू आन्दोलन उत्कर्षमा पुगेको बेला डेढ वर्षीय नाबालकसहित आठ जना सुरक्षाकर्मीको सामूहिक हत्या भएको थियो। उक्त आन्दोलनलाई चर्काउन चौधरीले मुख्य भूमिका खेलेको आरोप लागेको थियो।