काठमाडौं । इरानमा अमेरिका विरोधि बजेट प्रस्तुत गरिएको छ । राष्ट्रपति हसन रुहानीले अमेरिकाद्वारा आफूविरुद्ध लगाइएको प्रतिबन्धको सामना गर्न ‘प्रतिरोधी बजेट’ घोषणा गरेका हुन् ।

अमेरिकी प्रतिबन्धबाट इरानमा परेको प्रभाव कम गर्न राष्ट्रपतिद्वारा पाँच अर्ब अमेरिकी डलर बराबरको बजेट आइतबार सार्वजनिक गरिएको हो। बजेटले अमेरिकी प्रतिबन्ध र इरानमा देशव्यापी चलेको आन्दोलनबाट इरानी अर्थतन्त्रमा परेको प्रभावलाई राहत दिने अपेक्षा गरिएको छ।

सरकारले अमेरिकी नाकाबन्दीका कारण इरानमा परेको प्रभाव कम गर्न ४ हजार ८८५ ट्रिलियन इरानी रियाल (झण्डै ३६ अर्ब अमेरिकी डलर) को ‘प्रतिरोधी बजेट’ले राहत गर्ने राष्ट्रपति रुहानीले बताए ।

अमेरिकी नाकाबन्दी र दबावका कारण इरानी जनता आर्थिक मन्दीको सामना गरिरहेको हुँदा नागरिकको क्रयशक्ति घटेको रुहानीले स्वीकार गरे। उनले इरानी जनताले अमेरिकाविरुद्ध सरकारको कार्यक्रममा साथ दिने बताए।