धनगढी ।सुदूरपश्चिम प्रदेश प्रहरी प्रमुख प्रहरी नायव महानिरीक्षक रबिन्द्र के.सी.ले आज नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय अत्तरिया,कैलालीको स्थलगत निरीक्षण गर्नु भएकाे छ । निरीक्षण भ्रमणको क्रममा उहाँले कार्यालय भवन, शाखाहरु, ब्यारेक, मेसको निरीक्षण गर्नु भई सुदूरपश्चिम प्रदेश अन्तरगत ट्राफिक प्रहरी कार्यालयहरुमा कार्यरत बिभिन्न युनिटहरुका ईन्चार्जहरु समेतलाई आवश्यक निर्देशन दिनु भयो ।

निर्देशनको क्रममा उहाँले ओभरलोड, भवरलोड, क्षमता भन्दा बढी यात्रु बोक्ने, प्राईभेट नम्बर प्लेट भएका सवारी साधनले यात्रुहरु बोक्ने, रुट पर्मिट नभएका स्थानमा सवारी साधन चलाउने, नबिकरण फेल भएका सवारी साधनहरु पनि निर्वाध रुपमा चलाउने, क्षमता भन्दा बढी नदीजन्य पदार्थको भार बोकी सडकमा पानी चुहाउदै टिपरहरु गुड्ने,यदाकदा ट्राफिक प्रहरीहरुकै नियम उल्लघंनकर्ताहरुसंग अब्यवसायिक साँठगाँठ हुने जस्ता प्रबृतीहरुलाई पुर्णतया निरुत्साहित गरि उच्च अनुशासनका साथ उत्कृष्ट ट्राफिक व्यवस्थापन गर्न निर्देशन दिनु भयो ।

उक्त अवसरमा उहाँले सवारी दुर्घटना न्युनिकरणका लागि सरोकारवाला निकाय तथा नागरिक समाजसंग सहकार्य गरि जनचेतनामुलक कार्यक्रमहरु प्रभावकारी रुपमा संचालन गर्ने,ट्राफिक चेकजाँच कडाईका साथ पुर्ण ब्यवसायिक तबरले गर्ने,अनाबश्यक हैरानी नदिने,प्रहरी कर्मचारीहरुले नेपाल प्रहरीको मिडिया नीति बिपरित सामाजिक सञ्जालको प्रयोग नगर्न र प्रहरी आचरण विपरीतका कुनै गतिविधिमा संलग्न नहुन समेत सचेत गराउनु भएकाे थियाे ।