अन्तर्राष्ट्रिय विमानस्थलमा युवकमाथि दुर्व्यवहार गरेको आरोपमा ३ जना प्रहरीलाई कारबाही

उनीहरूमाथि थप अनुसन्धान भइरहेको प्रहरीले जानकारी दिएको हो ।

गत चैत ३१ गते त्रिभुवन अन्तर्राष्ट्रिय विमानस्थल सुरक्षा कार्यालय, गौचर, काठमाडौँमा कार्यरत कर्मचारीहरूले एक युवकमाथि दुर्व्यवहार गरेको भिडियो विभिन्न सञ्चार माध्यमहरूमा प्रकाशन भएको थियो ।

काठमाडौँ उपत्यका प्रहरी कार्यालय प्रवक्ता प्रहरी वरिष्ठ उपरीक्षक शेखर खनालले यस घटनामा आफूहरूको गम्भीर ध्यानाकर्षण भएको जनाएका छन् ।

‘सो सम्बन्धमा सो कार्यमा संलग्न देखिएका ३ जना प्रहरी कर्मचारीहरूलाई विमानस्थल सुरक्षा जिम्मेवारीबाट हटाई यस काठमाडौँ उपत्यका प्रहरी कार्यालयमा झिकाई आवश्यक छानबिन तथा अनुसन्धान भइरहेको व्यहोरा जानकारी गराइन्छ,’ प्रहरीद्वारा विज्ञप्तिमा भनिएको छ ।