कञ्चनपुर । कञ्चनपुरकी १३ वर्षीय बालिका निर्मला पन्तको बलात्कारपछि हत्यापछि न्यायको खोजीमा धर्ना बसेका छन् बाबुआमासहितको परिवारको स्वास्थ्य अवस्था बिग्रिएको छ ।

घटना भएको करिब चार महिना बितिसक्दा पनि दोषी पत्ता नलागेको भन्दै पीडितका परिवारले गत आइतबारबाट जिल्ला प्रशासन कार्यालयको गेट अगाडि धर्ना सुरु गरेका थिए । पाँच दिनदेखि निरन्तर रुपमा धर्नामा बसेका कारण पछिल्लो समय निर्मलाका बुवाआमाको स्वास्थ्य अवस्था दिनप्रतिदिन बिग्रिँदै गएको छ । चिसोका कारण पीडित परिवारमा रुघाखोकी तथा ज्वरो आउनेजस्ता समस्या देखिएपछि बिहीबार स्वास्थ्यकर्मीको टोलीले स्वास्थ्य परीक्षण गरेका छन् ।

आफूहरु छोरीको न्यायका लागि धर्नामा बसे पनि सरकारी पक्षबाट कुनै वास्ता नभएको निर्मलाकी आमा दुर्गादेवी पन्तले बताइन् । उनले धर्नाको पाँचौं दिन बितिसक्दा पनि सरकार पक्षका कुनै पनि अधिकारीले आफूहरुको मागका विषयमा चासो नदिएको गुनासो गरिन् ।

यता, चिसोका कारण निर्मलाका बुवा यज्ञराजको अवस्था निकै कमजोर भएको छ । उनको रक्तचाप घटेर ६७ पुगेको चिकित्कको भनाइ छ । उनीहरुको स्वास्थ्य जाँच महाकाली अञ्चल अस्पतालका डा. किशोर बोहराको टोलीले गरेको थियो । यस्तै, निर्मलाको परिवारको स्वास्थ्य अवस्था बिग्रिदै गएपछि कञ्चनपुरका प्रमुख जिल्ला अधिकारी तारानाथ अधिकारी र प्रहरी प्रमुख एसपी कुबेर कडायतले धर्ना स्थलमा पुगेर स्वास्थ्यकर्मीसँग पीडित परिवारको स्वास्थ्य अवस्थाबारे जानकारी लिएका छन् ।