काठमाडौं । नेपाली कांग्रेसका नेता गगन थापालाई इलामेली कांग्रेसले झलनाथ खनालको घर नजिकै भव्य स्वागत गरेका छन्। पञ्चायती शासन बिरुद्ध ज्यान आहुती दिएका ७ जना शहीदहरुको सम्झनामा नेपाल तरुण दलले आयोजना गरेको फुटबल प्रतियोगिताको उद्घाटनको लागि इलाम पुगेका नेता थापालाई इलाम कांग्रेसले भव्य स्वागत गरेको हो।

खनालको घर नजिकै भएको सो फुटबल प्रतियोगिताको उद्घाटन गर्दै नेता थापाले बर्तमान सरकार अलमलमा परेको आरोप लगाए। इलाम स्थित साँखेजुङमा नेपाल तरुणदल क्षेत्र नं ३ द्धारा आयोजित सातखाल्डे शहीद स्मृती फुटबल प्रतियोगिताको समापन समारोहलाई सम्बोधन गर्दै नेता थापाले यस्तो बताएका हुन्। उनले सरकारको कार्यशैलीप्रति कटाक्ष गर्दे दुईवटा पार्टी मिलेर बनेको सरकारका दुईथरी बिचार रहेको बताए।

अहिलेको सरकारको नेतृत्त्वकर्ता दल नेकपा भित्र दुई बिचार भएकाले बाहिर मिलेजस्तो देखिए पनि भित्र उनीहरुबीच मिलन नरहेको उनको आरोप छ। फरक प्रसंगमा उनले सरकारका नेताहरु एकथरी अमेरिकाको बिरोध गर्ने र अर्को अमेरिकालाई फकाउने रणनीतिमा रहेको बताए। उनले अहिलेसम्म नेपाली जनताले पाएको उपलब्धिलाई कसरी जोगाउने भन्ने चुनौती अहिले कांग्रेसको काँधमा आएको भन्दै अब नेपाली जनताले आन्दोलन थेग्न नसक्ने बताए।

हजारौंको संख्यामा भेला भएका समापन कार्यक्रममा तरुण दल क्षेत्रीय समिति क्षेत्र नं ३ का सभापति मोहन गुरुङको समापतित्वमा भएको समापन कार्यक्रममा नेपाली कांग्रेस इलामका सभापति हिमालय कर्माचार्य लगायतले मन्तब्य राखेका थिए। मंगलबार नै नेपाली कांग्रेस जिल्ला कार्यसमिति इलामले राखेको अन्तर्कृया कार्यक्रममा बोल्दै नेता थापाले बर्तमान सरकारले युवाशक्तिलाई नेपालमा नै रोजगारी दिनु पर्ने बताए।

उनले दुईतिहाईको सरकारबाट नेपाली जनताले ठूलो आशा राखेको भएपनि सरकारले त्यो पुरा गर्न नसकेको उनको आरोप छ। कार्यक्रममा कार्यकर्ताले राखेको जिज्ञासामा नेता थापाले पार्टीले जिल्ला जिल्लामा केन्द्रीय सदस्यको रोहवरमा पार्टीको गाउँ जागरण अभियान थाल्ने बताए। यसले पार्टीको संगठन सुदृढ हुने पनि बताए। कार्यक्रम क्षेत्र नं २ को मंगलबारेमा समेत भएको थियो।