मुक्ति खबर,पोखरा।

तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारी सवार हेलिकप्टर दुर्घटना भएको आज एक वर्ष पूरा भएको अवसरमा स्वर्गीय अधिकारीको शालिक आज पोखरामा अनावरण गरिएको छ ।

अधिकारीको शालिक उनको बार्षिकीको पुण्यतिथिमा पोखरा १८ जामुनबोटमा बन्दै गरेको सहिद पार्कमा अनावरण गरिएको हो ।

सुर्खेतका कलाकार तिलबिर सुनार सेन्चुरीले रवीन्द्रको मुर्ति तयार पारेर सहिद पार्कको पूर्वी भागमा राखिएको पूर्ण कदको रंगीन शालिकमा अन्य सहभागीहरुले पनि माला अर्पण गरेका थिए । उनको शालिकको माथिपट्टी हेलिकप्टरको डमी पनि स्थापना गरिदै छ ।

शालिकको गण्डकी प्रदेशका मुख्यमन्त्री पृथ्वीसुब्बा गुरुङ, आन्तरिक मामिला तथा योजना मन्त्री हरिबहादुर चुमान, उनकी धर्म पत्नी विद्या भट्टराई, पोखरा महानगरपालिकाका मेयर मानबहादुर जीसी लगायतले अनावरण गरेका हुन् ।

स्वर्गीय रवीन्द्र अधिकारी स्मृति प्रतिष्ठानद्वारा आयोजित प्रथम स्मृति दिवसलाई सम्बोधन गर्न आज नेकपाका अध्यक्ष तथा प्रधानमन्त्री केपी शर्मा ओली पोखरा पोखरा प्रस्थान गर्दे छन् । पोखराको सभागृहमा प्रधानमन्त्री ओलीले सम्बोधन गर्ने कार्यक्रम रहेको छ ।

तस्वीर सौजन्य : पोखरा न्युज डटकम