काठमाडौं । नेपाल कम्युनिस्ट पार्टी (नेकपा) का वरिष्ठ नेता झलनाथ खनालले स्थायी कमिटीको बैठक तत्काल बोलाएर पार्टी एकीकरणको प्रक्रिया टुंग्याउनुपर्ने माग गरेका छन् । झापाको बिर्तामोडमा प्रेस चौतारी र प्रेस सेन्टरले आयोजना गरेको पत्रकार सम्मेलनमा नेता खनालले सो कुरा बताएका हुन् ।

तल्लो तहका कमिटी र जनवर्गीय संगठन विघटनको अवस्थामा रहेकाले पार्टीभित्र असन्तुष्टि चुलिएको नेता खनालले बताए । ‘हामीले पार्टी एकीकरणपछि तलका सबै कमिटी भंग गर्‍यौँ, जनवर्गीय संगठन पनि भंग गर्‍यौँ, अनि यसबाट सन्तुष्ट को हुन्छ र ?’ उनले भने, ‘चाँडोभन्दा चाँडो एकीकरणको प्रक्रिया पूरा गरेर पार्टीलाई एकताबद्ध बनाउनुपर्छ, त्यो काम चाँडो नभएकाले सबै असन्तुष्ट छन् ।’

पार्टीका महत्वपूर्ण बैठक हुन नसकेकाले एकीकरण प्रक्रिया टुंगोमा नपुगेको उनले बताए । कोही असन्तुष्ट रहेकाले र कोही घुम्न जाने कारणले बैठक बस्न नसकेको खनालको भनाइ थियो । ‘स्थायी कमिटीको बैठक सम्पन्न भएपछि पार्टीले नयाँ गति लिन्छ,’ उनले भने, ‘बैठक पहिले नै बस्नुपर्ने थियो, १२ र १३ गते बस्नुपर्ने बैठक प्रधानमन्त्री बिरामी भएपछि सर्‍यो, अबचाहिँ बस्छ होला  ।’ एकीकरण टुंगिनुको कुनै विकल्प नरहेको नेता खनालले बताए । एकीकरण प्रक्रियामा ढिलाइ हुनुमा पार्टी नेतृत्वको कमजोरी रहेको उनको भनाइ छ ।

नेता खनालले पार्टी नेतृत्वको कमजोरीले सरकारका काम सुस्त भएको र विकासका कामले गति लिन नसकेको टिप्पणी गरे । देश विकासका लागि पार्टी एकता टुंग्याउनुको विकल्प नभएको दोहो-याउँदै नेता खनालले पार्टीलाई एकढिक्का बनाएर लैजान सबै तयार हुनुपर्नेमा जोड दिए ।

सरकारले गरेको काममा अझै सन्तुष्टि प्राप्त नभएको उनले जिकिर गरे । ‘सरकारले कामको गति तीव्र बनाउन सक्नुपर्छ,’ उनले भने, ‘सरकारले किन गति लिन सकेन भन्ने प्रश्नको जवाफ खोज्न हामी पनि लागिपरेका छौँ ।’