काठमाडौं। सत्तारुढ नेपाल कम्युनिष्ट पार्टी (नेकपा) को स्थायी कमिटी बैठकले गठन गरेको कार्यदल भङ्ग गरिएको छ। शुक्रबारको सचिवालय वैठकले कार्यदल विघटन गरेको हो। शुक्रबार विहान बसेको सचिवालय बैठकले एकीकरणका बाँकी काम सवै सचिवालयले नै गृहकार्य गर्ने प्रस्ताव स्थायी कमिटीमा लग्ने निर्णय गरेको प्रवक्ता नारायणकाजी श्रेष्ठले जानकारी दिएका छन्।

‘एकीकरणका जति पनि काम वाँकी छन्, ती सबैमा सचिवालयले गृहकार्य गरेर प्रस्ताव तयार गर्छ । त्यो प्रस्ताव स्थायी कमिटीमा पेश गर्नेछ,’ प्रवक्ता श्रेष्ठले भने, ‘साथै यसअघि बनेको कार्यदललाई धन्यवादसहित विदा गर्ने निर्णय भयो। पुस १३ बनेको कार्यदललाई एकीकरणका बाँकी काम टुङ्ग्याउने गरी प्रस्ताव तयार गर्ने म्यान्डेट थियो। कार्यदलको कामप्रति प्रधानमन्त्री एवम् नेकपा अध्यक्ष केपी शर्मा ओली असन्तुष्ट रहँदै आएका थिए।

हिजो मात्र बसेको स्थायी कमिटी वैठकमा अध्यक्ष ओलीले कार्यदल विघटनको प्रस्ताव अघि सारेका थिए। यता कार्यदलले भने विभिन्न कारणले पार्टी एकीकरणका लागि आवश्यक प्रस्ताव तयार गर्न नसकिएको जानकारी गराउँदै एक साताको म्याद मागेको थियो।