चितवन । प्रधानमन्त्री बालेन्द्र शाहले सार्वजनिक सम्पत्ति र राज्यकोषको दुरुपयोगमा संलग्न व्यक्तिमाथि सरकारले कडा कदम चाल्ने बताएका छन्। राष्ट्रिय स्वतन्त्र पार्टी (रास्वपा) को प्रथम महाधिवेशन उद्घाटन समारोहलाई सम्बोधन गर्दै उनले भ्रष्टाचार र आर्थिक अनियमितताका घटनाको छानबिनमा कुनै सम्झौता नहुने स्पष्ट पारे।

प्रधानमन्त्री शाहले विगतमा राज्यको सम्पत्ति र सार्वजनिक रकमको दुरुपयोग भएका घटनाको खोजी तथा अनुसन्धानलाई सरकारले प्राथमिकतामा राखेको बताए। आवश्यक परे सम्बन्धित निकायहरूसँग लामो समयसम्म समन्वय र परामर्श गरेर पनि सत्यतथ्य बाहिर ल्याइने उनको भनाइ थियो।

केही समयअघि अख्तियार दुरुपयोग अनुसन्धान आयोगका पदाधिकारीहरूसँग प्रधानमन्त्री कार्यालयमा भएको लामो छलफलको प्रसंगलाई संकेत गर्दै शाहले भ्रष्टाचार नियन्त्रणका लागि सरकार गम्भीर रहेको सन्देश दिए। उनले कानुनी प्रक्रियाभित्र रहेर मात्रै काम गरिने र कुनै पनि कदम नियम तथा कानुनविपरीत नहुने दाबी गरे।

सम्बोधनका क्रममा शाहले रास्वपालाई परम्परागत वाम, दक्षिण वा केन्द्रवादी राजनीतिक धारभन्दा फरक विकासमुखी शक्ति भएको बताए। पार्टीको मुख्य लक्ष्य सुशासन, विकास र परिणाममुखी काम रहेको उनको भनाइ थियो।

उनले रास्वपा प्रतिशोधको राजनीतिमा विश्वास नगर्ने तर सार्वजनिक स्रोतसाधनको दुरुपयोग भएको पाइएमा त्यसको अनुसन्धान र कारबाहीबाट पछि नहट्ने स्पष्ट पारे। विगतका गलत अभ्यासलाई संरक्षण नगरी जवाफदेहिता स्थापित गर्न सरकार प्रतिबद्ध रहेको उनले बताए।

प्रधानमन्त्री शाहको अभिव्यक्ति पछिल्लो समय अख्तियारसँगको छलफल र त्यसलाई लिएर उठेका राजनीतिक बहसबीच आएको हो। उनको भनाइलाई भ्रष्टाचार नियन्त्रण र सुशासनको एजेन्डामा सरकार थप सक्रिय बन्ने संकेतका रूपमा हेरिएको छ।