काठमाडौं। सत्ता गठबन्धनको सबैभन्दा ठूलो साझेदार दल कांग्रेसले मन्त्री बन्नेहरूको नाम तयार पार्दा मोहन बस्नेतको नाम पनि समावेशले चर्चा पाएको छ।

कांग्रेसले आठ मन्त्रालय पाउने निश्चित भएपछि सभापति शेरबहादुर देउवा र नेता डा शेखर कोइराला समूहबीच ६–२ को समहमति बन्यो । जसअनुसार कोइरालाले उपसभापति धनराज गुरुङ र मोरङका नेता डिकबहादुर लिम्बूको नाम सिफारिस गरे।

उता देउवाले मन्त्री बन्नेहरूको सूची बनाउँदा उपसभापति पूर्णबहादुर खड्का, प्रकाशशरण महत, एनपी साउद, सिता गुरुङ र रमेश रिजालको नाम समावेश गरे । देउवाले नाम तयार पार्दा प्रदेश मिलाएका थिए । अब देउवाको कोटाबाट थप एक जनाको नाम आश्यक थियो । यसका लागि पार्टी महाधिवेशनमा देउवालाई सहयोग गरेका डा शशांक कोइराला, प्रकाशमान सिंह र राष्ट्रपति रामचन्द्र पौडेलले आफूनिकट नेताहरूको नाम सिफारिस गरे ।

कोइरालाले दीपक खड्काको नाम सिफारिस गरे भने सिंहले राजेन्द्र केसी । उता राष्ट्रपति पौडेलबाट भने तेजुलाल चौधरीको नाम आएको कांग्रेसका एक पदाधिकारीले बताए । एक कोटाका लागि तीन ठाउँबाट नाम सिफारिस भएपछि देउवालाई सकस पर्‍यो । देउवानिकट स्रोतका अनुसार देउवाले कसैलाई पनि नचिढ्याउने नीति बनाउँदा तीनै जनाले सिफारिस गरेका व्यक्तिहरूलाई मन्त्री नबनाउने निर्णय लिए ।

उक्त स्थानका लागि सिन्धुपाल्चोकका मोहन बस्नेतको पनि लविङ थियो । उनी अर्थमन्त्री हुने दाबी गरिरहेका थिए । यसैमा उदयशमशेर राणाको पनि दाबी थियो । तर, देउवाले प्रकाशरण महतलाई अर्थ बनाउन सिफारिस गरे भने राणालाई अर्कोपटक मौका दिने भन्दै चित्त बुझाए । अन्तिममा बस्नेत सफल भए ।